Este ano tíñamos todo preparado para o magosto, pero a causa das condicións climatolóxicas, tivemos que aprazar os xogos coas familias, algo que sentimos moito. Aínda así, o alumnado puido degustar as castañas asadas e manter viva a tradición do Magosto. Esperamos poder compartir pronto unha nova xornada de xogos e celebración cando o tempo o permita. Aquí vos deixamos algunhas fotos do día.
Algo máxico aconteceu esta semana na escola… Co son da campá, chegou o trasno para xogar, traendo cousiñas do outono para observar e degustar.. Encheu os corredores de follas e deixou cestas cargadas de froitas. A súa visita fíxonos moita ilusión e lembrounos que o outono xa está aquí, cheo de cores, sabores e moitas cousas para compartir.
Iniciamos un novo curso escolar e, con el, tamén un novo proxecto de dinamización lingüística que busca dar continuidade ao labor de impulso e normalización do galego no noso centro. Este ano a nosa proposta leva por título “Galicia contada” e xirará arredor dos contos populares e da tradición oral. Cada cartel recolle unha ilustración dun conto, o seu título e o nome da titora e unha lenda pola parte detrás.
Dentro do programa do Modo Galego, tivemos a sorte de contar coa actuación de Pablo Díaz e Olga Kirk na escola. Foi unha actuación moi bonita, chea de música, que nos fixo cantar moito e desfrutar.
Como cada ano, volvemos xuntarnos na Romaría das Letras, unha festa para celebrar a cultura que nos une. Entre xogos tradicionais, obradoiros e moita alegría, rendémoslle homenaxe a nosa cultura, lingua e tradición. Grazas a todas as familias, pola vosa colaboración e polo tempo compartido.
Aquí vos deixamos uns
vídeos especiais con algúns momentos da festa para que poidades revivir
connosco esta celebración tan especial.
Este ano 2025, a Real Academia Galega decidiu dedicarlle o 17 de maio, un día tan especial ás cantareiras, esas mulleres que transmitiron a nosa lingua, a nosa cultura e a nosa música de xeración en xeración.
As cantareiras foron e seguen
sendo voz da tradición galega, coas súas coplas, cantigas e melodías que
nos falan da vida, do amor, da terra... Moitas veces cantaban sen instrumentos,
só coas palmas ou cunha pandeireta, pero con moita forza e sentimento.
Na nosa escola quixemos renderlles homenaxe cunha exposición no corredor chamada: "SEMENTES QUE CANTAN". Cada aula escolleu unha canción tradicional galega que aprendemos e representamos.
Con motivo do Día das Letras Galegas 2025, participamos na actividade "Sementando Cantares", organizada polo Concello de Ames.
Cada aula da nosa escola escolleu
un poema ou cantiga en galego e deixámolo sementado en distintos lugares
do Milladoiro: prazas, rúas, parques..., para encher o pobo de cantigas fermosas espallando a nosa lingua pola contorna.
Neste vídeo podedes ver o
resultado deste traballo tan especial que fixemos con moita ilusión.
