Premio Primavera das Letras 2018

Coa exposición "Os cachorros de Mª Victoria Moreno" a EEI Milladoiro gañou un dos tres premios da Real Academia Galega da Lingua, convocados ao abeiro da autora homenaxeada polas Letras Galegas 2018.
Hoxe, 16 de outubro fomos a recollelo. En representación do centro dous grupos de alumnado e as súas titoras, Cristina Barros e Laura León, acompañadas pola directora do centro, Ángeles Ferrón, a coordinadora do EDNL, Ánxeles Abelleira, a coidadora, Begoña e Andrea unha mestra en prácticas escolares.
Foi un acto ben emotivo, presentado polo presidente da RAG, Víctor F. Freixanes, conducido pola académica Fina Casalderrey, no que tamén contaban coa presenza do viúvo de Mª Victoria Moreno, Pedro Ferriol, e representantes das editoras galegas que doaron os fondos bibliográficos que constitúen o premio.
Un orgullo para nós e para os nosos pequenos que xunto cos outros dous centros premiados o CPI Virxe de Cela e o CEP Anxo da Garda, presentamos unha escolma e mostra do traballo realizado.
Moitas grazas a RAG.
Por mil primaveiras máis.

"Os cachorros" de María Victoria Moreno

Buscando o vínculo emocional entre a obra e figura de María Victoria Moreno e o noso alumnado de educación infantil, na EEI Milladoiro, demos en facer unha exposición sobre os seus "Cachorros", a súa querencia polos canciños, protagonistas de moitas das súas obras e dirixíndonos tamén á súa faceta profesional preferida, a de docente, na que chamaba agarimosamente "cachorros" aos seus alumnos e alumnas.
Con tal motivo, escolmamos:
-datos biográficos, fotografías, retratos e retrincos da súa vida,
-fragmentos e ilustracións das súas obras nas que aparecen os "cachorros",
-textos ou citas nas que fala da súa labor como profesora, a súa maneira de entender o ensino e de relacionarse sen distancias cos "cachorros", os mozos e mozas que asistían ás súas clases.
A achega do noso alumnado, tras explicarlle a razón de ser desta exposición, é a dos seus "cachorros" predilectos: reais, de peluche, xoguetes ou debuxados.
Ao igual ca María Victoria Moreno, pensamos que quen non trata ben aos canciños non pode ser unha boa persoa, porén dedicamos tempo a coñecer as características, coidados e atencións que requiren, e de como eles teñen sentimentos, sofren a anguria de verse perdidos ou de como devecen por un "anaquiño de bica".
Na etapa infantil temos a sorte de que calquera iniciativa que se adopte case garante a participación e implicación das familias, así sempre aproveitamos para facer esa labor de proxección exterior das actividades escolares, logrando que traspasen o ámbito da escola. Así, os días 8 e 15 de maio faranse sesións de portas abertas para que todas as familias poidan visitar a exposición.
Dos días 15 ao 20, trasladarase á Casa de Cultura do Milladoiro, na que terán lugar os actos das Letras Galegas, podendo así ser admirada pola veciñanza e visitantes.